جثة فكرة /بقلم عاطف محمد

جثة فكرة
من زمن أرجو ألا يعود أبدا...

الشاعر :عاطف محمد

اتولدت ف  صباح متعافى
خللا الليل يسجد قدامه
بعد ماارفه ف عز منامه
بعد ماأشهر سيفه الجارح
أعلن نسب الفكره وراح
راشش عطر نجومه عبير
ما لها امير
ولا مرشد ليها ولا كبير
صب ف قلب الفكره الد م
من غير هم  ... ولا احزان
ولاصوت بينازع  وبيبكى
دم بريحة المسك الملكى
خد من احلى نجومه الفضه
قام واتوضى
حط التاج ابو شكل زواتى
نادا ع القمرايا يوماتى
قالها هاتى
كل الضى المخلوق ليكم
 وافرشوا سكة
فكرة بكره
رشرشوا جنب
 السكه ورود
خلوا الصوت
 جنبها ممدود
مشدود وسطه
بحبل الفرحه
وسط زحام
 ايام مهريه
شرب الدهر.... عليها ومز
شافها بكره.... اتهز وفز
دوغرى رمالها
نظره لئيمه
قام وكأنه
 جان ف السيما
مثل دور
 أغلى الاحباب
دلدل لها
 حبل الاعجاب
نطت ضحكه
 راح مداريها
جوه جراب
معمول م العتمه
مع كل الايام... اليتمه
صرخ الصوت... العرقان بيها
اقروا الفتحه
 وانصبوا شادر
الفكره اتخنقت... من بكره
بعد ماشافت
 ضيق اخلاقه
والسكك اللى ماليها.... الخوف
نادت على كل المخاليق
وف ثانيه
 نصبوا لها المسرح
هيه اختارت اخر مشهد
قالت فيه بالحرف الواحد
بكره مات...
 وانا شفت جنازته
مركبه غرقت
 ف الاهمال
والهمجيه والتبعيه والانانيه
ابداعه طشت.... ملوخيه
وولاده خيل الدوريه
وقانونه طظ.... ياافند يه
قلبها مااستحملش يد ق
يدخل حرب
 ويبقله نصره
ماتت زى مامات الاسرى
زى ولاياه
 ف عز الحسره
ما بقاش
  منها غيرالذكرى
جثة فكره  ؟؟